Святитель Филарет (Дроздов) [Pagez.ru]



Начало: Святитель Филарет (Дроздов)

Тропарь, кондак и молитва святителю Филарету

Тропарь святителю Филарету, митр. Московскому, глас 4:

Духа Святаго благодать стяжав, / богомудре святителю Филарете, / истину и правду разумом просвещенным / людем проповедал еси, / мир и милость сердцем умиленным / страждущим явил еси, / яко учитель веры и страж неусыпный / паству Российскую жезлом правости сохранил еси. / Сего ради, ко Христу Богу дерзновение имея, / моли даровати Церкве утверждение, / людем и душам нашим спасение.

Кондак святителю Филарету, митр. Московскому, глас 2:

Яко истинный подражатель преподобнаго Сергия, добродетель измлада возлюбил еси, богоблаженне Филарете. Яко пастырь праведный и исповедник непорочный, по святем преставлении от безбожных поругание и поношения приял еси, Бог же знаменми и чудесы тя прослави и заступника Церкве нашея яви.

Святителю отче Филарете, моли Бога о нас, чтущих память твою верно, и научающихся правде от словес твоих.

Молитва cвятителю Филарету [1]

О преславне и богомудре святителю Христов Филарете, Российския Церкве светильниче, земли нашея похвало и граду Москве украшение! Ты житием и служением твоим трием вселенским святителем был еси подобник: Великому Василию - яко бытие сущих изъяснил еси, Церкве Божия и таин Христовых строитель добрый явился еси, иноческих уставов быв ревностный исполнитель и покровитель; Богослову Григорию - яко, неботаинственных созерцаний о Святей Троице и о Бозе Слове сподобивыйся, сих искусный провозвестник явился еси; Златоустому Иоанну - яко неустанный проповедник и учитель покаяния народа Божия был еси. И ныне, вкупе с ними предстоя во славе Престолу Божию (Престолу Живоначальноя Троицы [2]) и ходатайствуя о нас, моли: Церкве Российстей на камени исповедания Православныя веры утвержденней быти, стране нашей мир и единение даровати, пастырем слово Божественныя Истины право правити, град Москву и паству твою от всяких напастей сохранити. Святую обитель, идеже почивают честныя мощи твоя, по заветом преподобнаго Сергия, яко ученик его присный, добре управи; иноки в подвизех укрепи; наставники умудри; званныя к пастырскому деланию, учащияся вере и благочестию в вертограде твоем духовнем, соделай избранны и достойны служения сего. Призри с Небесе, святителю, на ны, чада твоя, и даруй теплым твоим ходатайством ко Господу в заповедех Его нам преспевати, веру тверду, любовь нелицемерну и благочестие (любовь нелицемерну, благочестие [2]) до последняго часа смертнаго сохранити, да непостыдно предстанем Спасителю нашему Господу Иисусу Христу, Ему же со Отцем и Святым Духом подобает слава, честь и поклонение, ныне и присно, и во веки веков. Аминь.

Примечания:
1. Текст молитвы предоставлен Максимом Плякиным, выверен по Месячной Минее-ноябрь, издательство Московской Патриархии, 2002
2. Разночтение с текстом молитвы свт. Филарету на сайте Храма свю Татианы.